კომპიუტერის დაცვა

საქართველოში ისევე როგორც სხვა მრავალ ქვეყანაში კომპიუტერების მნიშვნელოვან ნაწილს არ აქვს ან აკლია ე.წ უსაფრთხოების პატჩები ან არ აქვს დაინსტალირებული (ან გააქტიურებული) ფაერვოლი (Firewall); კომპიუტერებს აქვთ ანტი-ვირუსული დაცვა, რომელიც გამორთულია ან ვადა აქვს გასული, ან საერთოდ არ აქვს მსგავსი პროგრამული უზრუნველყოფა.

ბევრმა არ იცის იმ საფრთხეების შესახებ, რომლებიც მათ კომპიუტერებს და პირად მონაცემებს ემუქრება. უფრო მეტიც, ისინი საფრთხეს უქმნიან პირად თუ კომპანიის მონაცემებს. სინამდვილეში, ბევრი ვერც კი ამჩნევს, რომ მათ სისტემებს რაიმე საფრთხე ემუქრება. ინტერნეტის მომხმარებლებს ხშირად არ აქვთ უსაფრთხოების სათანადო დაცვის სისტემები თავიანთ კომპიუტერებზე, რის გამოც ისინი ჰაკერებისა და სხვა კიბერ დამნაშავეთა ადვილ სამიზნედ ხდებიან. დაუცველი კომპიუტერიდან ინტერნეტში შესვლით მომხმარებელი ხდება სპამის, ვირუსების და მრავალი სხვა მავნე პროგრამების მსხვერპლი. შესაბამისად, დაუცველია ისეთი სერიოზული დანაშაულებისგან, როგორიცაა პირადი მონაცემების მოპარვა ან კომპიუტერში შენახული მნიშნველოვანი ინფორმაციის დაკარგვა, თუნდაც კომპიუტერის უკანონო მიზენბისათვის ბოროტად გამოყენება.

ეს ნიშნავს, რომ ინტერნეტის მომხმარებლის უსაფრთხოებასთან დაკავშირებული მთავარი პრობლემა მათ საკუთარ კომპიუტერებს შეეხება და მათ არ იციან ან არ ესმით, თუ როგორ შეიძლება დაუცველი კომპიუტერების გამოყენება კიბერ შეტევების განსახორციელებლად ან მავნე ვირუსული პროგრამების გასავრცელებლად. საჭიროა საზოგადოებისთვის სათანადო ცოდნის მიწოდება იმის შესახებ, თუ როგორ აკონტროლონ საკუთარი კომპიუტერები და იყვნენ პასუხისმგებლები თავიანთ მონაცემებზე. ამ საკითხთან დაკავშირებული რისკები მეტად მაღალია იმისთვის, რომ ადამიანებმა იგნორირება გაუკეთონ მას.

 

”უსაფრთხოება არის პროცესი და არა პროდუქტი”